حوبة الشبكه

حوبة الشبكه
 الشاعر محسن الدخيلي



وحك ضيم الليالي
وشهكةالفركه
وحك كلمن جواه الضيم
نام وكتلته الحركه
وحك شفافنه الزركه
اهم بيك
بكثر ماهمت امك بيك
فك صدري
تعال وشوفني شتلكه
خلك شاعر واسولف بيك
ديوان القصايد
تاكل بخلكه
يشجرة موز
حكهه تغار منك شجرة النبكه
يليل دخيل بختك
لاتعبني
ملح طعم السوالف
يهطر الخيال
وتعثرك يخايب حوبة الشبكه
يليل الليل يمسودن
زعلنه شكد زعلنه وماتفاركنه
ولاتبنه
ولا حرنه
لان حبنه يعثرنه
مثل دجله وفرات ندور الولايات وشمانشتمر
نتلاكه بالكرنه
لوين تريد لاتعثر
بعد ماظل عمر بالعمر تتعذر
دصيراشماصرت ياليل
غصبا عالليالي
الفجر من ينطر
صعب كلش صعب طبعي
ولا طخ راس
واتكبر صدك عل علي يتكبر
صعب مالين
ماطخ راس
بس ويه اليحبني
بساع اتقشمر
اذا انساك
ممكن ما اكلك لاء
بس انسه العشك
اعذرني مااكدر
شفت موكتلك اتقشمر
يبو الروح العزيزه
شلون اجيك شلون
رف ليك الكلب بس انته جفلته
سمعتك ترس اذاني تكول ماحبك
دست فوك الجروح
وكلبي فززته
شجيك ؟؟
بياوجه؟؟
وتريد احبك بيش
لو كلبي ورق
والله شككته