ارحموني ولو رحمه

ارحموني ولو رحمه (عن قصه حدثت مع ابو خلدون)

يتحدث الشاعر الكبيرعريان السيد خلف عن قصه مرت به وهو يستقل سيارة الكوستر من منطقته الى باب المعظم يقول الشاعر عندما نزلت من السياره وانا افتح الباب واذا بامرأه لايبان منها شي ويبدو على انها بت عز؟؟؟

مدت لي يدها وقالت :

ارحموني ولو رحمه ..مره وعندي نثايه والوكت زحمه...

وقد تناولت مابجيبي واعطيتها فوجدتها حاله غريبه 

فكتبت مقطع يقول ..المقطع الاول كان لها

ارحموني ولو رحمه 

مره وعندي نثايه والوكت زحمه

جنت نجمه بسمه اهلي 

عاليه على الروس

وانثلمت سمانه وطاحت النجمه

جان الليل واهس

والسنين يطول

وعيون الزلم جمرات ملتمه

جان البيت مدول والدلال تفوح

والبن من يفوح الساهي يندله

وبكوسر البيت الزرك مرجيات

لوصفكن بالعتبه يزيحن العله

حتى جلابنه لونبح جلب الجار

تهز ذيوله اعلى الرجل متعلمه

للشاعر الكبير عريان السيد خلف

Résuméabuiyad

بالكيـــف هوه الگلـــــب

بلكيف

بلكيف هو الكلب لمن يحب بلكيف

بلكيف ريح السفن لمن تهب بلكيف

الدنيه مره بشته مره بسموم الصيف

هو شيشوف الجفن غير الدمع ولطيف

ياهيه يبو المستحه يلعينك اولايه

بيها الفرح والحزن يتلاكن احجايه

ايصير ضاع العرف والجرف مل مايه

وعينك ولاكل عين مشتني بين البين

لانصح بيه الهوه ولانصح بيه الحيف

هوه شيشوف الجفن غير الدمع والطيف

اوكحلتني بحلم بكليبي يفتك باب

وافرش سنسن العمر ضحكه وزعل وعتاب

وشبكة النسمه الزلف ومعانك اللبلاب

ومسره الملح بلعود بيه الحنين ايعود

افرح ولو بلحلم يلما صحالك كيف

هوه اشيشوف الجفن غيرالدمع والطيف

للشاعر عريان السيد خلف

Résuméabuiyad

لا تتمنى

لاتتمنى””””” ياكلبي لا تتمنى 

ماطول جافانه الهوى وبطلنه 

وك لا عين ظلت خاليه ولاظل ولف يتعنه 

وك لاتدك يالدكك قهر

 مقفول باب الجنه 

وهينوب مامش ظنه

آآآآ.....يا وكتنه الماصفت نيته وزرك عينه النه 

وطحنه بوسط شلوة هفه وكل ذيب يبرد سنه 

ردنه نكف وانهوش نحمي الروح ما أمجنه

وانت بجلادة عين صحت أكلنه 

وماطول راضي بموتنه استاطنه

„

„

آيا خسارت نوحنه ويا رخص ذيج الونه 

ردفن علينه أسهامكم وعلى الصبر لامنه 

لا للدنيه احنه صفينه ولا هوى الدنيه النه 

متبدل بطبعه الوكت لو إحنه التبدلنه

”

”

آيا هواهم بأول أيامه شكثر دللنه 

ومن وصل طينتهه الظهر كلهه تبرت منه 

لا سالفه بشفة محب ,,,,,لا عاذل اليعذلنه

أوحشت دنيانه وجنهه ابد مو ش النه 

متبدل بطبعه الوكت لو احنه التبدلنه؟؟؟؟؟؟

للشاعر عريان السيد خلف

Résuméabuiyad

غيظ الشوارب

غيظ الشوارب
الشاعر  عريان السيد خلف
طفح غيظ الشوارب بالفناجين
و خبط شطنه اِعله كبره الماي و الطين
غضب ..
وتنزّرت كل ذرة تراب
ونزع لونه العشب فوگ الروازين
عوارض ..
و انتخت مكحولة العين
بخوها
وسرّحت زين النساوين
وهوت .. مثل ام ولد تتلمس الگاع
چذب من گال نجفي وتذلين
وحگ ملحچ و طيبچ و المسافات
وحگ حرچ و بردچ و الچوانين
لون ليل الهوارف رادنه انشيل
نشّيلهم جثث و انتي التظلين
عزيزه انتي اشكثر!
واكثر تعزين
وزهه ابوجه العزيز الزود و الطيب
و حضن شمس العصر من رادت اتغيب
سليل امحاله و مهيوبة اذيال
وابن نخوه و كفو وشيمة معازيب
جميل ويه اليجلّه ابمر الايام
و شديد اعله الشديده وطايعه اتخيب
وسلس مثل الخبز وي طيب الذات
وامر من الامر وي ناكر الطيب
و سلس مثل الفرح بعيون الاطفال
وزعل مثل النمر لو واكحه الذيب
اذا نسّه الزعل من سود الايام
يفر دولابهن و اليرضع ايشيب
عراقي وگفت الدنيه من الوحام
وحالت و اكتفت ما غيرنه اتجيب
على العاقل بعد ما يخطف اشراع
ولا يخطي الطريده الليث لو جاع
يا شعبي اشكثر عانيت و انطيت
و خبزتك تنعجن بالهم و الاوجاع
يگطعوني عليك أوصل وابوس الگاع
گالولي تبيع ؟ وگلت ما ينباع
ارسم بالشوارع اسمك امرايات
تبرى لكل گلب ما تاه بالنيات
واكتب عالجرف اسمك هوية صيت
تندله البشر من تكبر الغايات
و احبك للنفس لاخر وهج عين
حب فرحه وحزن و مصالح و زعلات
يا خوف و امان و يا نفاه وضيج
و يا صفگه و بواچي وماتم و حفلات
و يا حب الحبيبه و رفة الگلبين
و رسوم الفرح من تحمر الوجنات
و يا آنه وهلي و صبري و جريب الناس
و يا عمري اليجي و عمري العزيز الفات
سألوني اعله لونك لونتهم بيك
شافوك ابدليلي اتحل حلم و تبات
سألوني اعله طولك طاولتهم بيك
گلتلهم عزيز اتطخلك الهامات
ما طول الصبر ما مات
هيهات البعد هيهات

Résuméabuiyad

مناضرة رحيم المالكي وعريان السيدخلف

رحيم المالكي
عليك الليل كلة انة اونة
ومعاك العتب هسة انة اونة
التهدد بالنفاهة انة وانة
ويلك مو طبك دهري علية





عريان السيد خلف
نبي ونجبر خواطر من يبينا
وسر موس البكلبي من يبينا
اذا مرة انتخينا من يبينا
نهد العالية بعلو الثرية





رحيم المالكي
لائن طكات شماتي بهاماي
وشل لا تضن عيني بهاماي
اذا عذ الرضا يبصم بهاماي
اكطعة الجان يرضالي بردية





عريان السيد خلف
العلية غير اهلها من علاها
وروحي خسة الكلك من علاها
بعزم الله نخلتي من علاها
يراموها بحجر وتضل صخية





رحيم المالكي
انة روحي الليالي من رسنهة
الاصيلة انت تعرفهة من رسنهة
سيوفي مغمدتهة من رسنهة
ركاب عداي ومبردهن ادية





عريان السيد خلف
اعلي بالوصل روحي علني
وسوالفكم بدلالي علني
ليالي لجنت خازلهن علني
وغدت عجلة مخالبهن علية





رحيم المالكي
انه الواضح والمبين ولا خاف
وانه الما رجفن جدامي ولا خاف
وانه الما نكص وزني ولاخاف
اختفيت وخفت وزن العلية




عريان السيد خلف
يكلبي شكثر يحمل بعد يملاك
تعدى والعقل بالصبر يملاك
ابن ادم لو ملك قارون يملاك
وبلا اخلاق ما ينسهب مية

Résuméabuiyad

اخذني وياك

 

الشاعر عريان السيد خلف

(( أخذني وياك ))
جملني بعد كطره 00 وخذني وياك
هناك 00 الفيض كلبك 00
حتى روحي تنام
عصفورة جرف 00 بلل جنحها الكيض
اخذني وياك
امشي ابغير واهس 00
والطواري كصار
وعيوني غرب 00 وجفوف اديه اوداع
واسمي 00 ابغير معنى 00
وميل كحلك غاب
وتنشدني اعله كلبي !
كلبي حب وذاب
ياكلبي حلك تنور 00 لو سرداب ؟
صوغني 00 ولو من ليلكم نجمه 00
تبات وياي
ومن تشبع سهر 00
ويجيسها الوهواس
اطفيها ابصبح 00
والغبشه رشكه ماي
واشعلني ولع 00
يدوي العطش بالعود
حتى انزع جلد روحي 00
وارد لصباي
أملني الفرح بسمك 00 ورد عالباب
فاحت ريحته 00 ولنك بعد ماجاي
بعد ماجاي !!
من ياصوت أصيحك ؟
والصدى ايجاريك
واكلك : مكدرت 00 يالتكدر ابلياي ,

Résuméabuiyad

عاذرك

 

الشاعر عريان السيد خلف

(( عاذرك ))
كاسرت عمري اعله عمرك
كطعت ليش . . وحِـركتك
جويه مني وجويه منّك
ونتشيت . . استاهلك . . شهكة عوافي
وخيّبت ظني . . وصدك ويّاي ظنك
ماكلت عنك . . عرك جفّك ابجفّي
ولا كلت جاسك زعل . .
واشتعل دمي ابنار دمّك
أصعر . . وتستسهل . . اتشاغل خيالي
وياخذك غيّك . . خرز خلخال . . تِـطّــشّـر وألمّك
ومدري ليش . . أتمايزك وردة اكرنفل
اِتّيه روحي ابريحتك . .
واحتار من ياصفحه اشمّك
أختلي ابحسنك . . وافج كلبي واطلعك
تلعب ابعمري . . وخاف الغير يندلّـك وأضمّك
خاف تاخذني . . اعله بستانك فرحِتي . .
وخاف تكبر حيرتي . .
وحسنك يغرّك
خاف تِطشّر ولك . . وشلون المّك ! ؟
كالو : ايحبك ! !
كلت من شاف كلبه ؟
وجبّست دمعي . .
وسكن نبض الكلب . .
عن لا يذمّك
تِرسْ جفّي . . اسوالفك وحده اعله وحده
وعرك جيدك زمزمي . .
وخجلان تتعذّر !
واكلّك : لايهمّك
من تجِسني اشفايفك
تاخذني غيبه !
ومن تِرِشْني ابمزنِتَك . . ولهان افز . .
لن روحي يمّك ؟
اختلي ابحسنك . . وأفج كلبي واطلعك
تلعب ابعمري . . وخاف الغير يندلّك وأضمّك
وخاف تطّشّر خرز . .
وشلون المّك ؟
اشجان ضرّك . .
تختصر بعدك عليه ؟
وكلّي شكرات وحمد
للمختصر . . حسنك ابخصرك
تشرب معافي . . حناني ولهفتي
وتنتشي ابغيّ الشذى . .
وتتعزّل اعزال من اجرّك
من جمعني وياك ؟
من شدني . . ويه طولك . .
طعّمك بيّه
وصرت حلوك ومرّك
لنها ما بالغبشه . . غبشه . . ابغير عينك
خاف اترزبيك .. حد كطع النفس
وازهك واضرك !
خاف تطشر خرز ..
وشلون المك ؟
ومن كبل .. كل شوكه عمري من الطوارف
حسبت مثل الوداد .. الفات ودك
من كبل .. وآنه الورع كحل اجفوني
وجنت اظن :
وكت التهد بيه روحي اهدك ..
لني كلما فززن صبري الليالي ..
وخان وكتي
اتوسلك .. هدوة كت خليني عندك
اوعاذرك .. لو هدل عودك ..
من كدر يحمل حسن مثلك وكدك ؟
عاذرك تغلط ابحكي ..
وتبخل ابظلك على النايم ابسدك
عاذرك تغتاض ..
بس من غير شاره ..
وشارتك هالبينت
ودخيل جدك
عاذرك .. عن لايهم كلبك ابهمي
وتنترس عينك دمع
وتنترس عينك دمع ,
======

Résuméabuiyad

عشكتك حلم

 

الشاعر عريان السيد خلف

(( عِــشكـَـْــتك حلم ))
عِــشكـَـْــتك حلم
بالوحشة البعيده اتسامر اجفوني
وعِــشكـَـتكَ
من ونيــن النايحـه الحره
التلم مجرى الدمـع
من عينها اعيوني
وعرفتك تستحي من العايزه الجبحه
وتـِفل فل الظفاير سفة اضنوني
وتوسمتك .. نِكـش بجفوف بدويه
وذهب ليره .. وشهامه .. اتوج شمس لوني
وتِـعودتك
حليب الوالده الطيبه
وصبرها .. وشيبها
اليتعب على امتونــي
ونذرتك وجه للنجمه الجديده
ونايل وغايه
سمارك عزّتي .. وعشاكـَك اهوايه
عشير الكل عشير ايصونك ابروحه
وبري من كل وجه لو ما حفظ مايه
اشـمّك بالجفوف الطاهره الخشنه
واشوفك بالوفي الكِصٌته امندّايه
وأبورح
لو هبوبك يلتكَـي اّبارح
واخضّر بالعطش من هيبتك دايه
انه ابغيرك كـَمر ما شافته اولايه
انه ابغيرك قلب نِـــيٌته امغـَطـّـايه
ويظل طرواك
نسمة بر.. لايرخص شرفهه
ولاهي تتعـثــّر
يمن طرواك .. خاوه الجدم والمعبر
يمن طرواك.. خاوه الجرح والخنجر
تعودتك
شهامه وخوف ومكابر
وتعـّودتك
محــّبه وليل ومسامر
وتعـّودتك .. خليل وخل
حبيب وكل حبيبه اتبيع طاريها
و ِنــِــتْ
ما بِعِـتْ طاري الراح والمجبل
يمنجل مايلف الردي من االسنبل
يذل وجـــــــه اليضدّك
ونته ابد ما اتذل ,
======

Résuméabuiyad

كَوّه

 

الشاعر عريان السيد خلف

(( كَـوه ))
كَوه .. كَوه اتريدني العذال ارد
للشوك واهوه
او ما دروني اضحك ضحك .. مجبود
.. جالمجبود كَوه
او مادروني .. اسحن سحن بالروح ..
واخزن هالعذاب ابسمل جلوة
خايف السان البطر ، واضحك ..
جذب
.. والنار جوه
او صابر .. او روحي ابملام اللايمين
ابتلت بلوه
حارت اوياهم ، يذكروها .. المضه ..
او كَالوا : اشدعوه ..؟
واصبحت مثل اليهد .. اوحيد ..
جدام الزلم .. وبعازة اخوه
ينولي .. او خالي الظهر ، مهظوم
بدموعه ايتجوه
ذكرت روحي ابتعبها .. الضاع ..
جالهويه
ابشبج ، والراح فدوه
ونت .. او ونة توالي الليل ..
للمالوم سلوه
بارت .. او جاري البزل .. شيفيد
من يحرن ابعلوة .. ؟
او دورت صاحب كَلت : بلجي امن
المجافينه اشوه
لنه ركَطة خيط .. وبسم الثعابين ..
يتطوه
ارد اشج روحي .. ابرمح ..
حسرات ، من تذكر الخوه
وارد اصيحن : تايب .. امن
الشوك
.. ما ظل عمر يسوه !
======

Résuméabuiyad

حني حني

 

الشاعر عريان السيد خلف

(( حني حني ))
اشويه ياعين الخشف .. خزرات
المعاتب .. جوني
من كثر ما لوع .. حتى اهلي ..
اصبحت جزعانه مني
رافكَتني الونه .. والحسرات
من بطن الحملني
او هذا عمري .. امكَالب اويَه الضيم
ما مر الضحج .. مرة اعله
سنّي
او هذا حجي الناس .. اون من لوعتي
او كَالوا يغني
فتَّر اعيونك .. تره اعيونك كَصن
بسنين عمري او ذوبني
آنه احب منهن .. نبل مغتاض ..
خلهن يوجعنّي
ذابل .. اوكَاصي العطش وياي
جا هلبت رونّي .. ؟!
انسه حزنك .. لا يحن حزني ..
او على اعناد الحزن ..
يا زين .. اغنّي
حتى اصيحن : يا حسرتي اتباعدي
او يا بسمتي الضاعت تدنّي
آخ مني او آخ من روحي الكَت
هذا العمر بس بالتمني
وسرت بيها او صحت : يا روح
هدوة ليل ، عنّي
آنه .. موش اول هرش . داسن
بسبّاحي .. اولوني
آنه .. مثل الناس .. لِكزني ابرمح
بوك ، اوجفني
ضيعن دمي .. ولا جنهن الجاتل ..
وانكرنّي ... !!
يالتلجين اعله شوف السود ..
بس اكَفن .. نسني
ثكّلّن حمل البعد .. وآنه الرجيج ..
اوكلفني
ذوبي من نار الجفة .. او بدموعج
اليجرن تهني
اوعني .. خليني استجن .. يمعذبه
.. اشتردين مني .. ؟
او هذا عمري مكَالب اويه الضيم
.. ما مر الضحج .. مرة
اعله سني
اوهذا حجي الناس .. اون
من لوعتي .. اوكَالوا :
يغني
======

Résuméabuiyad

هذاك آنه

 

الشاعر عريان السيد خلف
(( هذاك آنه ))
هذاك آنه .. الكَطعتي الماي .. عنه ..
او عاش باحزانه
هذاك آنه - الشراع .. الماكسر نوماس
سفانه
او هذاك آنه - الربط بالمستحة
اِلسانه
اعت روحي .. اويعتها الشوك ..
واشتلها اعله بنيانه
ابصبر .. بلجن ، يمرها الطيف
ياخذها اعله جنحانه
او يوديها لولف مامون .. تغفه ..
ابطيب ريحانه
او هذيج انتي اشمجالب بيج .. لنج ..
طالعه دنانه
اشرخص بيع الرخيص .. ايصير
لو ما ثكَل ميزانه
يسرّي الجزع كتمانه ..
او هذاك آنه - الونينه ايدلي ..
المتيهين .. لو ضيعوا عنوانه
او عذابه .. اولاعذاب ايوب ..
مر مره .. اعله بيبانه
او عتابه .. او يا عتب ، جندوب ..
متعلك عَلَه اردانه
ايعمت بيك .. ايتسله وياك
واترده اعله ديدانه
وجد .. واملاوح الدمعات ..
مل اعيون ندمانه
او هذيج انتي .. الخطيه ..
المارضت
تغفر خطايانه
اورمتنه .. وحملتنه اهموم ..
فوك
.. اهموم دنيانه
اوجفت .. لا بخّت الملهوب ..
ولا وجّت
بكَايانه
او هذاك آنه .. هرش لوشح
عليه الماي .. كَوة ايعيش
باحزانه
======

Résuméabuiyad

لاتجينه

 

الشاعر عريان السيد خلف
(( لا تجيــنة ))
:لا تجينه .. لاتجينه .. جان كَلت
ابوجه الابيض ..
غير معشركم لكَينة
جينة مشتاكَين .. وبلهفة .. او تسد
بابك علينه
جينه ايدفعنه الهوى . اودمعاتنه
اتكَطر بدينه
اوجنت اظن عندك وفه .. اورحية
من فرد طينة
غمكَت جرح الجفة .. اوزدت ..
الكَلب ونه لونينه
اعتب اعله الروح .. جي لنها اعله ..
ريحتكم حنينة
واعتب اعله الشوك .. والعشرة ..
اوسوالفها الحزينة
علمتني شلون يتبره .. الخوي ..
اوحمل اليكَع محد يعينه
عفية صحبة هالوكت .. بيها اليجافي
.. اشوكح عينه ..
او لاتجينه .. !! - ما اجيكم واليدك
بابك ، بعد تنشل يمينه
او جينه .. مدري الجدم زل بينه
العه دربك .. لو عمينه
اوجيت ارد اروحي .. البكَت سنتين
بديارك رهينه
اوجني ضيف ! او عادت الينضاف ..
للخطار .. يرخص ماي عينه
وانته .. ما جنك ربيت ابماينه ..
او شارب حنانه
وانكرت حتى العرف .. يوم الوكت ..
.. بيدك رمانه
عفيه كَلبك هلبت ابساعه .. وفه
.. ابالك طرانه
او جينه نشجيلك .. عذاب اجروحنه
.. او لوعة هوانه
آخ .. يا دمعك فلا يبطل .. يهل ..
لمن عمانه
يا عفه اكَلوب التشيل .. الظيم
وشنحمل عفانه
او حتى اعز الناس من طحنه ..
ابهظم جاروا علينه
:او من وصلنه الدارهم كَالوا
اشجابك ؟. لا تجينه
عفيه صحبة هالوكت بيها اليجافي
اشوكح عينه
======

Résuméabuiyad

ما افيدك

 

الشاعر عريان السيد خلف
(( ما افيدك ))
يالعز دمعك .. شلك بدموع عيني ؟
اتريد ازيدك
لا توصي الناس وتكلف كَلب .. تعبان
.. كفارة بريدك
لا تذوب شمعة العشرين .. والعشرين ..
جالزنجيل بيدك ..
لا تحط نفسك شكَص نوجات .. وانته
حجاية العاذل تصيدك
لا تحط كَلبك على الصوبين كل وصله
.. بكتر وتكَول : اريدك
يالشلت كَلبي.. اولظمت الخيط ..
بجروحه .. اعله جيدك
يالتظن .. حسنك ملك .. عالناس
.. والوادم عبيدك
ما افيدك .. ! آنه راضي ابحالتي
او حالك .. عله ويصعب مناله
مغتر .. او طبعك عَوَج .. متصلب
او يصعب عداله
انته دمعك بالمثاقيل انشره .. او دمعي
اليهل .. محد بجاله
انته عنبر . وآنه صم ادنان .. وانباع
ابرخص ، محد بحاله
يالسكن وسط الكَلب .. ويوك
متغاوي ابدلاله
انته فاله .. ركشت ابكَلبي .. اولجت
نابين .. واكَعدها الدهر للجنّة اجماله
واصبرت راضي ابعذاب الروح ..
والسكته .. اصبحت وياي
حاله
يلي جامع بين طبع .. الذيب ..
واوصاف الغزاله
حلو .. او عادات الحلو .. من كثر
ما يغتر .. يجط لوله اجماله
ماله وكتي او اياي ، ورطني ابعشك
جذاب ... ماله .. ؟
شَفِج .. بس ابدفكَة الدمعات ..
خلاني اعله باله
جالغريج الجرته الخورة .. لغميج
الماي .. واتعذر نتاله
يلي جنت اوياه .. متساوي السهم ..
والوكت حطني .. اوراح شاله
اتنزرت روحي .. او صفت تعرض عن
اسمك .. ما تريدك
يالحسرتي اتونسك .. ومجاذب
الحسرات عيدك
ما افيدك
======

Résuméabuiyad

منهو انته

 

الشاعر عريان السيد خلف

(( منهو انته ؟))
منهو انته .. ؟ منهو انته .. ؟
او جالغريب ... اعرضت عني !!
.. اوضيعت كَلبي .. اورجفته
آنه ، من جافاه خله .. او مانصح
.. وياه وكته
آنه زين .. او شين .. لأجلك
غلّست عنه .. او حملته
كورت .. حسرات كلبي .. او شوكَي
.. بين اجلاي ، جبته
اوجيتك .. ابتله دليل ..
المايعن .. واشكثر لمته
جيتك .. اوجرني الهوى ..
اوطاعة .. ذليل الشوك ،
طعته
اوجنت . اظنك .. طيب .. اوجفك
على الطيبات ، فلته
حسبّت لسه اعله حالك .. اريحي
اوذاك الوفي انته
حسبت .. غم الوكت .. يا رخص
الحساب الحسبته
جيتك .. او حسبالي اخو..
اوسمت الاخو .. يطلب
ابدرته
يا ونين المانفع .. جارد صخر من
مات ، لاخته
او ياحسرتي الطوّلت .. ومكَضي
ليل اجفاك .. سكته
صابر .. اوذوّب سواد العين ..
صبري .. او ما جزعته
وانته ابد .. ما جنك انته حتى
يومن كوضّت كَلبي اوبلايه
اوداع عفته ..!!
وآنه اجيتك .. واليجيلك ابزوم
عاني لشوفتك .. ليه ما عرفته ؟
لا تلكَيته ! .. بسلام احباب ..
ومحاضن حضنته
اولا بجيت الحالته .. اولا نشّفت
.. بايديك دمعته
اولا كَطعت النفس منه ، اوطردة
الضايع طردته
اولا نشدته ! .. هذا المتاني الوفه
.. هلبت يناهي .. اعرفت
قصته
يا ندمته ، يا فشلته اشكَد تعب ؟
تالي ابجحف مكسور .. بعته
======

Résuméabuiyad

نذر

 

الشاعر عريان السيد خلف
(( نــذر))
ليس عندي غير روحي
وكانت .. وتبقى نذرا
.......
ادك روحي .. نذر للجايب
ابشاره
واورجه اعله الجروح ، المالهن
جاره
جرح ينزف .. جرح باني .. اعله
بسماره
- خجل .. والمايخاف اللوم.. يرضه
ابذلته وعاره
يالمبشر .. مته المكَصوص جنحه
ايطولن اكَصاره ؟
ومتى الوكت التراده ، ايبدل
اطواره
ومتى العايش غريب ، ايأمن
ابداره ... ؟
يالمبشر .. ممحله الروح ..
غيمك .. عزّت امطاره
اوجثيره المايهزها الضيم ..
جن اكَلوبها حجارة
ولو لذة عشيج الموت .. كَلبه ..
ايموت بسراره
لجن ، شانت على المذبوح .. دمه ..
ايضيع فجّاره
دَفك عينك ، زمانك ليل ..
ليل .. ايريدله انطاره
ولا كلشي الجليته ايطيح زنجاره
ولا كلمن يموت ايضيع تذكاره
هلبت .. مات
(جيــــفاره .. ؟)
اوهلبت .. (هوشي منه )
انكَطعت اخباره ..؟
عمت عين الوجاغ الماتشب ناره
ولو دنياك غداره
ولو .. جرحك .. جرف تعبان ..
تغفه الآخ باكتاره
لجن .. بيه العتب شاره
امن اشوفن : دانك السفان ..
صار الروج .. حدّاره
يهلتشبر ، خيال الليل .. وترد
كَاصره اشباره
اعله هونك .. بيه الك حسبات
كلها اغيوم مطاره
ابدمع ، يا دمعة المهظوم .. ما
ما تعتاز .. تسياره
يناري .. المالجم عاره
اعله هونك .. من يهاب
السيل .. لو ينخاض
تياره
اعله هونك .. من تربّه اهلال
.. غطت غيمته انواره
دَذر ، جرح الصبر بارود ..
خل يتباهن اكتاره
يبارغ .. من تضيف الموت ..
يخشى الموت .. خطاره
آنه الجرحك .. عشت مجروح ..
وانته .. ابعشر معشاره
الم بيه الوجع نيشان ثاير ..
ما يرد ثاره
واهزك هزة المطعون ، من تتلايم
اكتاره
اعله وكتك والوكت مشوار ..
غمّه الباع مشواره
واداري العيب تتداره
اداري العين .. وانته العين
.. والدم .. اورفيف
الدم
اداري الآه .. انته الآه ..
وانخه الروح .. لا تهتم
اداري الحيف .. كل الحيف ..
ظل بيك الحلم .. يحلم
اداري اوكَضت روحي انذور ..
لاوِد لا شمل يلتم
يهاوي الروح غم الروح كون
ابشان ما تحلم
يباجي العين .. ذل العين
بالدمعات تتوشم
هظم والشال هظم الناس لوجّه
الموت ما يندم
لَوَن .. شحت دموع الغيض ..
خل دمع العتب .. يلتم
ندامه ، اعله الشرف .. ينداس
والداس الشرف .. يسلم !؟
ندامه ، اوعزّة المندوم .. وكت
الثار .. يتحزم
فشك .. والمافهم معناك ..
بزمور التفك .. يفهم
او جرعنه .. اشجم شكل
علكَم .... ؟!
وِنِت طيف المحبه .. اوشوك
الولايه
انت .. زخات غيمه .. ابكَاع
صبخايه
يشاتل بالكَلب دايات .. دايه
اتلوب .. من \دايه
يبو الشط التعيش اوياك ..
قصته .. طينته .. اومايه
اشتكَل لمشذبات الروس ..
لوجن ليك .. شجايه ..
اشتكَل للطاح .. بين ارماح .. كلها
اوياه كَصايه .. ؟
اشتكَلي ؟ .. اوبيك روحي اتموت
وترد .. بيك تتحايه
ابرجاها ولو كسرها ايجيد .. تصرخ
وين جباره .. ؟
اوثكَلها .. اوعادة المضهود .. بالمعبار
.. يتباره
ولو .. جرحك جرف تعبان ..
تغفه الآخ .. باكتاره
لجن .. شانت على المذبوح .. دمه
يضيع فجاره

Résuméabuiyad

ردي ردي

 

الشاعر عريان السيد خلف

 (( ردي .. ردي ))
ردي .. ردي
ياضعن شت عن هلة ، اوحدّاي
غربة .. البيه يحدي
ردّي .. ينباع العشك .. والياكَلب
تهوين صدّي
لا تهيجين الجروح .. اجروحي من تنلجم
... تدّي
وانة من دم اولحم .. مو من صخر
جبدة العندي
ردّي .. مليت الصبر .. وامكَاطر
الدمعة .. اعلّة خدي
وانة .. خلاني الوكت .. ناعور
بس اترس .. وابدي
جورت ليل الصبر . واعجزت منه ..
واهذا حدّي
بلجي من يغفة الجفن .. ما جلمة
التنكَال ، بعدي
انة موش اول زند .. يشتل
شلب .. ويحصد بردي
اولانة بس اتغربت والمعتنيلة ..
ايصير ضدي
ردي .. ردي
مالي حيل امعاتبج .. وانه العليج
اديت جهدي
غلّست .. عن الكَلت والكَال ..
كَمت اسمع .. واعدي ..
او صابرت صبر الطفل .. شربي الطفل
والحزن مهدي
واحملت ليل العطش .. وانه العيون
السود .. وردي
اوساهرت .. طول البعد لمّن
عشكَت اليال .. سهدي
والله جا مل او جزع .. لو قصتي ..
اعلة ايوب تسدي
ردي ..وانة .. موطبعي العتب
عالما حلاله .. ايصون عهدي
يا رخص ذاك الجدم . كون اعله ياهو
الجان .. يبدي
او يامناحه ذلتي .. اوليل الكَضيتة
ادموع وحدي
وانه .. من دم .. اولحم .. مومن
صخر جبدة العندي
انه خلاني الوكت
ناعور
بس .. اترس وابدي
======

Résuméabuiyad

الجثة والدود

 

الشاعر عريان السيد خلف

 (( الجثة والدود ))
تنيتك عود .. ينشاف العطش بيه ..
او عله .. المامش ، اهروشي اتجود
الوذ ابشيمة العاكَول .. واصعد .. عله
الآه اصعود
زمراوح يعمر اجفاك .. جرح ايصيح ..
او جرح يهود
او تنيتك وانت ميت شوك
ظنه اعله اليموت ايعود
اتاني الود .. يدمعة عين .. طاحت
وشيردها اردود
واشعزة الدمع بالعين .. لو ..
شح ساعة المنكَود
خليني اعله بالك .. طيف .. لو عادت
ايامي يعود
او خليني اويه دمك شوك .. من
شوكي البلايه احدود
ومحالل بعت وشريت .. بيهن والعمر
معدود
او مو ندمه الغزالة اتطيح .. صيده
ابشبجة الصايود
لاجن يالعزيز الحيف .. عالصايد
يكَع مصيود
لو ذيج الليالي اتعود ، او لو شطنه الجزر
يومين .. خنياب .. او يرد صيهود
جنت اصرخ : يهلغراف ما تغسل
اكَلوب السود
وتشلبه اعله سور الغيض .. لو ..
باب العتب مسدود
وكَبالك وافك الروح .. من .. حبل
الوفه المعكَود
وتكتر ولك دنياك .. خل تنكَص ..
او خل اتزود
واتصبّر .. يكَلبي انعيش .. تتواكَد
واكَلك هود
دنياتك نحيسة عين .. والوادم ..
خلية جود
وصوابك .. يجرح الآخ .. كل آخ
التلجمه يزود
يمعتب هظيمه اعليك .. تحصد ..
باثة المحصود
او تعتب والعتب مدفون .. جثة
التم عليها الدود

Résuméabuiyad

غريبة

 

الشاعر عريان السيد خلف
(( غريبة ))
يا غريب اذكر اهلك - والكَالها
.. ابحجية ايتنكّت
هيّج اجروح الكَلب .. والعين ..
كت مهضوم .. كتت
ذكروّها .. واعادة اليذكر يحن ..
والروح .. لاهل الروح حنّت
ونتّ .. اوماظن مثل ونها .. الصخر
.. خنساه ونّت
صبّرتها .. اوكابرت عالظيم .. والكابر
.. يظل بسكوت .. ينهت
طاحت ، اوفوك الفشل .. بمصابها
الشامت .. تشمت
شلون ذلت .... ؟
اخ ياروحي .. الكّبل جانت عزيزة
شلون ذلت .. ؟.
ملت امن اونينها .. او عذّالها
امن اللوم ملّت
واصبحت .. مثل الرشة المتروك
من يشله .. جليبة
اوحنت .. اوعاداة المحبين ..
لو حن المحب .. يطلب حبيبه يالتريدين
الولف .. ولف الجفاج .. امنين اجيبه
كافي غيبه .. كافي .. جلمات العتب
عالناس .. ياروحي الغريبة
يالمثل دلّه استوت بوجاغ ما يخمد لهيبه ..
يالتظنين .. ابعظم بلواج .. ما صارت مصيبه
هذا سهمج .. والسهم لوعات
والخانه الوكت يرضه بنصيبه
او هذا طبع الناس .. بيهم بلاوفه
اوبيهم وفي .. اتجيبه الحليبه
وانتي لا جف الينشف العين .. لا دار
الولف .. يمج جريبه
يالحسرتج . حسرة المجبود .. وادموعج
تبدّت
يالعلى اجروحج .. اعز الناس ..
من شافت ، تشمت
يالتظنين الشمل .. يلتم ..
شمل عزّج .. تشتت
======

Résuméabuiyad