هم يا گلب بالبچي وحن يا گلب عالراح

هم ياكلب بالبجي وحن ياكلب علراح

واسبح بشط الحزن ظهر ومسة ومصباح

هيم بصحاري التعب واجويك من ترتاح

مادام ضاع القفل شنسوي بالمفتاح


مليت وك ياكلب

دكاتك مسودنة وجنهن بضلعي رماح

جم موت اجة ومامتت يلبيك سبع ارواح

وياك انه حرب وكلمن يشيل سلاح

تكتلني لو اكتلك بالحالتين ارتاح

فاتك قطار الهوى وبعيد عنك صاح

والشيب حنه الزلف وانوب بالخد لاح

امشي اعله حدر الحزن شفت الحزن ذباح

ياادم شحصلت من شجرة التفاح

للشاعر كاظم اسماعيل كاطع

Résuméabuiyad

المحطه

عاشرت ليل المحطه


وارتجي يجيبك قطار



والقطار لو يحب مثلي


وتشب بضلوعه نار


يسرع بمشيه ويجيبك

بالفجر كبل النهار


ولو تعبني انتظارك


شارك العمر بسنينه

اهواي كالو ما يجيك


وكلبي جاوبهم يجينه


ناشدت كل روجه عنك

كا جرف كحلت عينه


واسالت كل الشواطيء


بلكت تجيبك سفينه


ولا سفينه ولا قطار


خلصت عمري انتظار 

الشاعر الكبير كاظم اسماعيل الگاطع

Résuméabuiyad

بيت النار

 

لاتكحلني ابصورهم
وك مراودهم عمتني
وعيني لوحه امشركه
بالك تدك واتبسمر الطيف اعله جفني
بعدك تحن

وشباقي عندك غير سله

لاوراق الحزن

بعدك تحن


مو بس شواطي الذكريات


محركه بيها السفن


ساكن ابيت النار


كل هذا الوكت


ساكن ابيت النار مو ما ينسكن

الشاعر الكبير كاظم اسماعيل الگاطع

Résuméabuiyad

الغربة

 

الشاعر كاظم اسماعيل الكَاطع

 

شفت التعب وتعلمت معناه

وتعلمت السهر
والسكتة والصفنات
ذليت ذل النهر من ينكطع مجراه
واعرفت .. كل شي عرفت
حتى النخل ينحني
الريح السفر من يجي
وجايب غريب وياه

• **
الله يا هالوطن شمسوي بيه الله
نيرانه مثل الثلج
كلما تدك الضلع .. ابرد وكول اشاه
• **
اللي مضيع ذهب بسوك الذهب يلكاه
واللي مفارك محب
يمكن سنة وينساه
بس المضيع وطن
وين الوطن يلكـــــــــــــــــاه
اه يا وطن يا خبز .. يا لشارتك تكتل
يا وطن يا زفة قمر
ونجوم إله تهلهل
عذبني .. ما عذبك
أكتلني .. ما اكتلك
طبع اليحب ينكتل .. موش اليحب يكتل
• **
اه يا وطن يا جذر
والجذر طبعه قوي
بالريح ما يجفل
اه يا وطن يا جبل
ياجبـل ياجبـــل

والجبل من عادته
لو مات من العطش للوادي ما ينزل

والجبل من عادته
لو مات من العطش للوادي ما ينزل

• **
علمني الفراك
اعزف لحن غربتي بقيثارة اشواك
واسهر واحن وانفعل واتمنى واشتاك
علمني الفراك
ما مش مثل ديرتي ولا نلكة مثل عراقنا

عــــــــــــــــــــــراق

Résuméabuiyad

ملفته للإنتباه

 

الشاعر كاظم اسماعيل الكَاطع

مثل شبوي المسه بعطره وشذاه
حبـٌه.. حبـٌه وكَطره .. كَطره
وبالرسم طوٌل خلكَ بيــج الإلــــه
صوٌر عيونج مواني
وبيها عاف الليل نومه وذب غطــــاه
من بعيد إنتي جميله !!
من قريب إنتي جميله !!
واكَفه .. تمشين حلوه
والحلو وجهه يبيٌن من كَفـــــــاه
عيوني ما تكذب عليــٌه
العسل يم الإشاره
جدٌى منـٌج .. كِسَر كَلبج
وأخذ من خدٌج حـــــــــلاه
الله .. الله إشهل حلاه
الشكر ماكان مزروع إعله كَـــاع
أرض خصبه للشكر هاي الشفاه
والكَلب مدري شجـــــــاه
قبل كنت أكَدر عليـــــــــه
ألوي إذانه إيخاف منــــــٌي
وهســٌه صرت أمشي وراه
وهســٌه صرت أمشي وراه
ولا حيــاء في الحب
_ أحبج _
خل يحسبوني رجل حن إلصِــباه
لأن ملفته للإنتبــاه
**************
سنه إشفافج عله إشفافي
بصراحه الوكت موكافي
أريد الشته إيصير أربع مواسم
ياحضن دافي
وأريد الليل سبع إسنيـــن
والله إيمــَوٌت الغافي
لو طال السفر ويـــاج
من روحي الخدر ينزل عله الرجلين
وأمشي إعله الجمر حافي
ولو ميت وأمر بشارع إمشينــاه
أنسه جنازتي وتتحرك أطـــرافي
.. ولو يطفه الضوه من الصبح لليــــل
:- عن بيتي تِكَـــول الناس
عنده إكًلــوب ما طــافي
ضـَعٌفني الزمن لكن أكابر بيــج
من صار النهر دهله إبربيع الفات
مَدٌيــتي إديــج ورد نبع صـافي
سنه إشفافج عله إشفافـــي
بصراحه الوكت مو كـــافي

Résuméabuiyad

إعلى صدرك مشتهي النوح

الشاعر كاظم اسماعيل الكَاطع

أريد أبجي إعله صدرك مشتهي النوح

و أريـد أكَعد إكَبـالك وأحسب إجروح

ومثل الطير من يودٌع الروح

جاي أركَص إبابك ركَص مذبوح !!


إهي كسرة عظم ماتجبــَر بيوم !!
ولا دورة سنه وآثارها تروح


كِسروا واهسي وخلوٌنــي مالوم
وخايف عله عيوني بالبجي إتروح
كنت آمر وأنهي وصاحب الراي
يوم أييـــدي طويله وجيلتي إتلوح

أريــد أبجي إعله صدرك مشتهي النوح
وأريد أكَعد إكَبــالك وأحسب إجروح


أريد أركي أعله صدرك راس تعبــان
وأسولف عن عذابي وغربة الروح

جاي أنزع إبجـَفٌك سهم الأصحاب
تبروا من طحت عافوني مطروح
سحكَوا فوكَ راسي وجرهم الخوف
ونزلو للوحَلْ من عالي السطوح
ويومإلليٌ شفتهم وكَعو إبٌيـــر
نزلت وساعدتهم وآنـــه مطروح
ويوم إللٌي شفتهمنزفو إهــواي
كَمت إنطيت دم واحلبت الجروح

أريد أبجي إعله صدرك مشتهيالنوح
وأريد أكَعد إكَبالك واحسب إجروح

Résuméabuiyad

مامرتاح

الشاعر كاظم اسماعيل الكَاطع

ما مرتاح .. ما مرتاح .. مامرتاح
عيوني تستحي بس الدموع إوكاح
ما مرتـــــــــاح
منٌك.. منٌي .. من الجاي من الراح
ما مرتــــــــاح
عركه وي الزمن ورجعنه مكسورين !!
وبعيده المسافه وينٌسي اللٌي طاح ..
ما مرتـــــــــــــاح
لأن شفت الشمس نزلت تبوس الكًاع
وبكف الطفل تنلاح
ولأن قاضي البلابل مدٌد التوقيف
ومفتوحه السِما
والفيل عنده جناح
ما مرتـــــــــــــــاح
لأن قفل المحبه إنباكً
وِترهٌم عليه مفتاح
ما مرتــاح
متروك بجزيره وتيٌهت بالليل
وإجو ربعي عليٌه بقافلة أشباح
وإنته إشبيك ؟؟؟؟؟
لمٌن دافعت عن نفسي صابك غيض
مو حتى الكًنافذ من تحس بالخوف
تستخدم جلدها سلاح !!
ولا جن الفجر مثل الفجر محبوب
لون الفجر صاير يقبض الأرواح !!
ما مرتـاح من ربعي ولا مرتاح
تمساح إبنهرهم صاحو من الخوف
وجازفت بحياتي من سمعت إصياح
!!! صارعت المنيٌه وبيده هزني الموت!!!
ومدمٌى إطلعت :-
صفٌكًو للتمســــــــاح
كل هذا وتريد أرتاح
ما مرتـــــــــــــــاح
ما مرتاح من ربعي ولا مرتاح
نادوونـي.. وركضت إبليــل
إيد الرسن بيها وإييد بيها سلاح
عثرت مهرتي ... وربعي قبل ما طيــح
واحد كًال للثاني
أبشـــــرك طـــــاح
أبشــــــــرك طــــــــاح

Résuméabuiyad

وداع الحلو

الشاعر كاظم اسماعيل الكَاطع

ودعناج
ووداع الحلو يكلف
وزتينه النعش بدموع
من ديارنة لحد النجف الاشرف
بوداعج وكفنة اصفوف
وجان الكلب باول صف
شفة تعظ ندم عالراح
وجف ايذب حركته
وينكسر بالجف
لان شحة نساء ابهلوكت تدرين
من نفكد المثلك
والله نتاسف
لان شحة كرم واخلاق
وتخاف العطاشة اعله النهر ينشف
صفنات وجمر عالايد
ونلف الحزن مثل الجكاير لف
الدهر ثكل علينه اهواي
ثكل والحمل ما خف
صلف كل ما يضعف الروح
يترهة ويصير اصلف
ولو اهلي وهلج
وسوالف الايام
ما صارت اتراب برف
هلي لو حاولو بالماي
بينه الماي يتنظف
هلي لو حاولوا بالنار
بيت النار جنة بثلج يتسكف
عهد نبقه حزانه
اعليج
ويتعاتب عليج البيرغ
المارف
روحي مودعه بالله
بيتج يم علي الكرار
يم والد شهيد الطف

Résuméabuiyad

العمر كَاضي

الشاعر كاظم اسماعيل الكَاطع


العمر كاضي
الدنيا ما دام انتهت..
والعمر كاضي
منهو بينه بلا خطيئة
خَلْ يكوم اعلّه الملف
يكشف الماضي

خل يجي يسويله مره..
ايشوف بيتي إشراح وشظل
من غراضي
ناس صعدت ناس بعدت
وأنا بخيمتي وسوقي وعكاظي
وجان بامكاني أصير
لكن هموم العشيرة…
لا أنا راضي على شيخي
ولا عليَّه شيخي راضي
جان بإمكاني أصير
أملاك وقصور وأراضي
لكن أعرف هاي كلها
ماتساوي فركة إيد..
وراس محني ابّاب قاضي
لكن اعرف هاي كلها ماتساوي
نوم ليلة اعله المخده
بليَّه خوف وبال فاضي
هِيَّ مو بالسرعة تلَّم
ولو على السرعة يصير
أغنى شخص عدنه الرياضي
خلصت عمري بدولتي
لا أنا راضي اعله وضعي..
ولا عليَّه الوضع راضي

Résuméabuiyad

ريحة الحنطه

الشاعر كاظم اسماعيل الكَاطع


ماخذ وياي العراق بجنـــــطه
ما كفت الجنــــطه
طالعه منها مناره وعثك نخلـــه
وشعله من عيون نفطه

وراح نوصل… ذاك حد السيطرات
وذيج ضوايات المحطه
وين اضمها.
لا هوه اكتاب ويخليه المسافر جوّه أبطـــه
الحمد لله.. الدنيا ليل… ونقطة التفتيش سنطه
هاي نقطه ويمها واحد
نقطتين. ثلاثة. خمسه
ست نقاط ويمها واحد!!
تنحسب مليون نقطــه
وصاح مسؤول النقاط بصوت عالي
هاي ما معقوله جنطـه
بصيحته انزرعت الساحــــه
رجال أمن ورجال سلطه
بجرة السَحَاب شافت عينه نجمـه
وطكته ريحة الحنطــه
ما لكه غير العلم.. كلي شيـفيدك
كتله غربه
إحنه غربه
ومن نموت هناك… جا بيش انتغطه؟
أخذ للجنطه تحيه… وكلي توصل بالسلامه
وهاي أول مره أفوت بسيطره…
وما انطي رشوه وتستعد كدامي شرطه

Résuméabuiyad