لم ايام هجرك

الشاعر حمود البدري

لم أيام هجرك وكعد حسبهن
وشوف شكثر راح امن العمر عدهن
اكبار أيام هجرك والسنين ازغار
ازغر جرح صار خلافك ابكدهن
أنه خلافك جروحي صايرات ابيوت
امشرعه ابوابهن والشامت ايدكهن
وحيل جفوف بعدك تدك باب العين
مومثل الجفوف الجنت اواددهن
تجيك عيوني تركض من يهزني الشوك
وأنته شما يهزك تبتعد عنهن
مثل واهس طفل ظلن عيوني عليك
ملن من كثر ماكمت اواعدهن
وكمت بجفوفي اشاور خاف اسمع العين
وعلى جفوفك كمت كل ثانيه انشدهن
أنه رايد سيوفك تجي تهد اوياي
مارايد تجيني ابركبتي تحدهن
جزه وكت السوالف والعتاب اوياك
مايسون بعد حتى امن عددهن
كتلك دير بالك لاتمد رجليك
رجليك اعله كد الحافهن مدهن
أنه مارايد افتح للسوالف باب
امنفك بيبانهن ماتكدر اسدهن
لاترجع بعد مره الحياة الوياك
ولارايد اسنيني الراحن اتردهن