مثل موسيقى
مثل موسيقى
الشاعر انيس العيساوي
الشاعر انيس العيساوي
مثل موسيقى خطواتك على الكاع
تسترخي الشوارع لمن اتفوت
وتستسلم جنود الطائفيات
وكل ذكر الحروب بشارع اتموت
من تشهك ابيوت اهل المدينة
ذيج الساعة نعرف انت مريت
لان مثل الفجرمن تطلع اتكول
صباح الخير بيت ايكعد ابيت
اذا كل بيت شفتة بغير شباج
محلتك لاتسلهة مغيمة اشبيج
ضلك من يمرنة ايبوك الابصار
ولهذا السبب بعنة الشبابيج
عليك الله صاحت حتى الاطفال
تركت عيدهة وما لازم اتصيح
درو بالعيد راح اتعايد الناس
ولهذا لغو لعب المراجيح
تشرب ماي لمن تعطش الناس
ومثلهة انت رغم رقة جمالك
بس اشلون لمن ايعطش الماي
عطش دجلة وشرب صورة خيالك
اذا قارنة واحد يوم وياك
طبيعي ابلا جدال الاول تفوز
رأيي وما اصدرة ابيوم عالناس
الك بغداد من غنتهة فبيروز
حلم وردي اذا مريت عالناس
بس حلمك علية ايمر كوابيس
لان كلش احبك لكن ابعيد
الواقع بين فقري وعرش بلقيس
وانة ابلايا هدهد لا ملك زين
فقط املك قصيدة وثوب احاسيس
انة شاعر فقير بطرك الاحساس
احب بغداد والحب والفراشات
واحب امي الفقيرة وطشت الماي
واحب احلامي ترويهة الحمامات
واحب....
بس كلشي احبة بشوفتك مات
وماتت بية كومة احلام حلوات
ولان احلامي ماتت الك خطيت
شاعر شاف عينك حبك ومات