200 ومضه لعدة شعراء

اليكم 200 ومضه لعدة شعراء

 مستخرجة من قصائد قمت بجمعها من هنا وهناك بأسماء شعرائها اقدمها بين ايديكم عسى ان تنال اعجابكم

1_ براسي طلقة موت بس مرت سلام

لو مدنك جان ما شر جاسه

جندي امريكي رماني واستحيت

خاف عني يكول دنك راسه !!!

مهندالسيدهاشم

2__ آنا عيوني طوس وليلهن ناعور

ينترسن دمع والليل يجفيهن

ألك برزخ صور بين الجفن والعين

أصفى من النوايا النشترك بيهن

عباس العبادي

3_ انت آخر نفس وشكد عزيز تصير

وبلحظة الموت تريدنا نملّك ؟

جبار رشيد

4_ صرت شجرة على درب اليحطبون

نهر متروس ماي وكلبة يابس

يلوموني بغيابك صرت ماشوف

بلا الشذرات مو تعمى المحابس ؟

احمد الذهبي

5_ انا مشتاكلك كد ما ألي جروح

اطيبهن واحس يفزن عناد

تدري شلون حالي لمن تروح؟؟

مثل حال العراق بلايا بغداد

أيهاب المالكي

6_تعال الخاطر الله ترخص من الموت

واجب مهم عدنا نريدك الليلة

و رمينا بتفكتك مارمت تعرف ليش؟

سمعت بيك ميت غصت أبجيلة !

نائل المظفر

7_ ها يم الولد نام الولد نام

هاج استلمي جثة وعدّي العظام

مابي كل نقص بس جفة ماخوذ

اخاف يرد عليهم يسحب اقسام!!

عزيز شامخ

8__ نومة العاشك عبادة

شرط ماناسيلة موعد

نوفل الصافي

9_ما تعله بملك طبعك حلو يعليك

الي صاحب نزل من صعدت احواله

مثل عود الشلب ما يعله وشكد ماي

عكس جذع النخل يصعد بلوشاله

سمير صبيح

10_ طمّو النار ونسو جرح الرماد

يجي يوم تلجمة ريح وينتفض

بهاء الكاظمي

11_

حسرة العاجر جبيرة

من تشوف ابن

لشريجتهه يشب

هاشم الخزاعي

12_

يمة القنبلة مابترت رجليه

هو انفجر يمهة وبتر رجليهة

علاء عسكر

13_ آدم عراقي طلع

واحنة الدفعنة الثمن

من طكلة تفاحة

عبدالحسين الحلفي

14_

انتقلت لرحمة الله شعندك وياي

هم تريد تاخذ رحمة الله

سعود الخفاجي

15_

يختلف طعم الهوه مابين شبر وشبر

چن طعم جنة ونار

عصفور شفته بقفص ..

رغم الهوه البقفص بس طلع المنگار

ميثم فالح

16_

خيط عله الجرح باللحم صرت اوياي

لو كلّ الجروح اتطيب ما افلّك

جبار رشيد

17_

يعجبني الحجاب بروس البنيات

بس ارفض بنات افكاري احجبها

يحيى العلاق

18_ على نار أنتظر ومتاني ألأحباب

وإندك باب بيتي وألكلب ذاب

إطلعت للباب عود ألباب أفتحة

لكيت ألباب طالع فاتح ألباب

عبدالحسين الحلفي

19_ حزام الناسف اعل السيطرة يفوت

وتكض السايق الما لابس حزام؟؟

ميثم وفي

20_

عودت روحي تون والونه صارت طرب

الناي لو ما يون جا حاله حال الكصــب

سمير صبيح

21__

مرضني هواك وتعب الروح

ومكان المرض خلّه بروحي ميّة

واذا ضد حبك اضرب ابرة ونساك

مضرب ابرة اضرب صيدلية

برهان العراقي

22_ لا تكولون الذنب ذنب البنات

وبالهوى تكولون ماعدهن وفة

كلوبهن ترفة ورقيقات النساء

الله خالقهن حنان وعاطفة

عادل محسن

23_ انا صح دنكت كدام الامريكان

لكن دنكت شديت قيطاني

نائل المظفر

24_ يبو ايد الثلج لا تطلع بتموز

مو خاف الثلج خاف الخلك تبرد

واذا لا مو ثلج كل هالبياض منين؟

معقول العظم فوك الجلد يصعد

نائل المظفر

25_ انا عيوني فنادق والدموع اوفود

أذا غادر وفد يحجزهن الثاني

خالدالسعد

26_روحي ولا تكلها اشبيج

وانت الماي

مكطوعة مثل خيط السمج روحي

مظفر النواب

27_جنت انه الوم النخل لو من ادين السعف بالريح يوكع عثك؟؟؟

بس جربتها وشفت؟؟

شفت العطش لو هجم اول ضحية العرك!!

كاظم اسماعيل الكاطع

28_

لابسني

انه اعترف

بس انت كلش حلو

جي انت لابسني؟؟؟

سعودالخفاجي

29_ليش تتهمني بكطع حبل الوصال

وتدري بيه من ينكطع معناها اموت

اني من كد ما تعب تفكيري بيك

مالي حيل اكطع خيوط العنكبوت

برهان العراقي

30_

اول ابتدائي وجنطتي خيوط

ومن بين الكتب عطر الفقر فاح

كباب تلوك بالفرصة التلاميذ

واني اكرط غفل بالفرصة مساح

برهان العراقي

32__خطيه امنه اشگثر تتحمل اهموم ؟؟؟

ومابين المهد واللوح تگعد....

تهز گاروگنه امن اتريدنه انام....

وتهز تابوتنه امن تريد نگعد؟؟!!

مهند سيد هاشم

33_ تسمع غير صوتك اذني متريد

واعيد يوم اذا صوتك لفاني

كون الصوت بالجف ينلزم كون

لجيب الصوت من حلكك لذاني

علاء ال ياسين

34___ اطش بجروحي حنطة وأزرع أغصان

حتى تخيط جروحي العصافير

سيف الحلفي

35__ دليني عليك اسنين تايه بيك

وامشي وياك ادورك خاطر اندلك

جبار رشيد

36_الشمس من تطلع عل الناس

تحبل بالقهر

تثكل بطنهة .. وغاد.. تنزل بالجزيرة تجيب

كاظم اسماعيل الكاطع

37_تركنة الجامعات واحنة شبان

وكعدنة بصف الاول واحنا شياب

نائل المظفر

38_ تفــــز بيــــك الجــــــروح أبجفــــــك السجيــــــــــــــن

أجـــذبهـــــــن وكــــــول أعيـــونهـــــــــن تغـــــــــــــزل

ومثـــــل نــزلـــــــة الخـــــــرزه التنلظـــــم بالخيــــــط

هيـــــج أنــــت أعلـــــى جـــرحـــي أبخنـجــــرك تنـــــزل

نهادالخيكاني

39_ وآنة ماكلك جذب فيلك يطير

بس أريد عيوني كون تشوفة

عزيز شامخ

40___ الفنجان يفرح لو لفة الخطار

ومن شدة فرحتة يركص تشوفة

غزوان الغالبي

41__ أمس بالطيف چني بغير ذرعان

وسمع صوت صاح اليوم موتك

سولفته الصبح للعنده تفسير

گال إحذر فقط من غدر إخوتك

ولاء الغزالي

42_مدري ليش اشتاكلك وكت الغروب

ومدري ليش اتذكرك وكت المطر

ولاتكلي الدمع مابين عليك

مايبين دمعة من يبجي النهر

جمال الازبجي

43_ أنا بعين الجسر واكف حرس بالليل

وبعين اليخوزر من تمر حلوة

ايهاب المالكي

44_ الماي ما يسحرك

لو ما سما زركة

ميثاق قاسم

45_غير تمشي وتاخذ اسراب الحنين... حيرتني اشبيها ماتعرف تحط’’’,,,

هبط منسوب الدمع لمن اجيت.. ومن مشيت اترفع منسوب الضغط..

خالد الفراتي

46_

مره بستك

........... صارت بشفتي خليه

حيدر آل محمد

48____

اني وي نيوتن اتشابه اكيد

وكل فرق ماصار بينه وبيني

اكتشف تفاحه طاحت واني لاااا

اكتشفتك من طحت من عيني

عطاء البديري

49_

حسبالك صبغت الباب من جيت

فرح ولخاطرك عــــــود انسه العتاب

اسود جـــان بابي بلون العيون

ومن كـــد مابجه صار ابيض الباب

سعود الخفاجي

50_

آية انته بجمالك والجمال اشكال

بس انته جمالك صعب يتفسر

اشكن من عسل مخلوق مو من طين

جربت من ابوسك يصعد السكر

محمد العيساوي

51_يالشعرك مليّل حل حلال الخل
وطول واهسّك للواهسه امخيّل
اسلم من عذاب الآه والياويل
وعللني بهواك العافيه اتعلّل
عريان السيد خلف





52_
ذبيته الفرح كحلة بظلام الليل
ذبيته ونسيته وراح من بالي
لكوا غيري واجوا دكوا عليه لباب
الك هذا الفرح ؟ لا كلت مو مالي
سمير صبيح




53_زين وناس اكو وماعندك عيون
آنا عيون عندي وماشفت ناس
كبل عباس اكو بس مالكة جفوف
هسة جفوف اكو بس ماكو عباس

عبد الحسين الحلفي







54__اذا مو انت مهدي وآنة مهدي نصير
لو يطلع المهدي المهدي مايطلع

نائل المظفر



55
أيد أنصيد بيهة الطار والحاط
وأيد على الثرية انحمّس الصيد

عطا السعيدي




56__

اريدن اخ مثاله الاعلى عباس
عندي هواي مثل اخوان يوسف
حيدر العيساوي




57__
يلوموني علحبي الزايد وياك
واضن يهواي حكهه الوادم تلوم
بكثر ما جنت اشبكك ياضوه العين
صفت حته الهدوم تحب الهدوم

حسين الكطراني




58___مو حكه لون يزهك الفنجان
تتلكاه بالعسمة الاجاويد؟؟

سعد محمدالحسن




59__ تعال وطب عليه بكل غبار البيك
صدك لاوحقك ابد مالومك
بس يوم التفكر تطلع من الباب
ذيج الساعه لازم تنفض هدومك

علاء الياسين




60__ يميني البالحروب تصير زلزال
وبخصرك عجيبة أنحنت يمناي
علي مطشر



61_حمدت الله لان مطرها يوم اجفاك
.... كمت ابجي اع كيفي ادموعي ما تنشاف

مصطفى المياحي


62__شايب وبصلاته يناجي الرحمن
( ياربي رحمتك واسعة وتزهي
ألك وجهت وجهي ربي عندي اطفال
باجر بيش أوجه لو كلو وجهي)

خالدالسعد



63_ اكل عمري الحزن واستفحلة الشيب
مثل صبّورة تاكل بالطباشير

يوسف حسن




64_
آخ لوتدري شكثر عالبال اجيت
وشكثر مرت سوالف جارحة
البارحة الطرواك من كد مابجيت
إنكسر خاطرها وبجتلي البارحة
سعود الخفاجي



65___مشه بيه العمر وبكلبي نزعة طيش**وتناقض بين روحي وشيب البراسي**
كلما بالوجه تطلع ملامح شيخ**يطلع حب شباب ابوجه احساسي

يحيى العلاق





66_اشتهيت بروحي اضمك مثل ماضميت
سرك بين كلبي وضلعي واحساسي
وماضمك براسي وراح اكلك ليش
خايف من عذابك يشتعل راسي

محمد الكريطي






67__ مني تريد احبك ... عمي مامعقول

وانه ابن المسعده وانت ابن ؟ماكول

فرق مابينك وبيني بكثر مــــــــابين ...

راتب الرعايــــــه وراتب المسؤول

سعود الخفاجي



68__ ضاكوا اخدودك ولكن ماشروك...وهاي اثار اشكثر موجودة..
وهاي موشامة البخدك لاسراب..هاي نظرتهم عليك السودة..
خالدالفرات




69____بيتك من زجــــــــــاج وبابه مشلوع .. على الوادم احــذرك تشمر حجار
خشب للنار اجــــــــمع وأشمر بذوق .. خشبه العدها غيــــره تعور النار

عمار ثامر الجبوري



70_

 امي وي الزجية بيوم الحساب
تجي رجل و رجل وي الزجية
تطلع فاطمة بجفوف عباس
وامي هناك هم تطلع بدية

نهاد الخيكاني



71_

 دوس على الورد صار الورد ينداس
بس عطر الورد ماتكدر تدوسه

ناظم الحاشي

72_-_ بساتينك زهن بس شلي بيهن كون
غيري يشم عطرهن وآنة الاسكيهن

عباس العبادي



73__اليسألوني اعلة صحتي اتمنة اكلهم زين
بس ماترضه اجذب دمعتي البلعين
كبل بس الغريب منين اكل للناس
بس بغيبتك كل الوجوه منين؟

رائد ابو فتيان





74___وماتفهم كلامي جردت الاسلوب
كمت احجيلك اني بكل بديهيتي
اذا نيتك تروح ونيتي الله وياك
جذابات احسهن نيتك ونيتي

غسان اسماعيل




75___لأن ادري الخذك يدفن هوة البيك
ارفعت صوتي بشجن ويه اليغنون
ماغنيتلك وين انت موجود
تحياتي الك وين انت مدفون


انيس العيساوي


76_ جفنينك سما ومجفي على رمشك ليل
اذا ترمش يضل فرقد يطك فرقد

نائل المظفر






77_تكدر تكض شاربك,,, وتسوي بالمدرسة رفعة علم من صدك وتصفك الطلاب؟؟,,,

دستور من تنسأل عالنفط ماريحته؟؟ ,, لدكول ريحة نفط .. ثق تعتبر جذاب !!
دستورنا شم عدل كل كازنا والنفط بي ريحة مال احزاب !!!

عبدالحسين الحلفي

78____سيفة البالحرب عصة متاع يصير
زحمة ابين اخوته وبالشقا ايسلة
جبار رشيد




79_____
أغار عليك حته من الهوى الهاب
وما أقبل تمسك حتى لو ريح
وما أقبل بعيني تكبر هوااااي
أخاف تصير أكبر منها واتطيح

حسن البدري




80____
لتخاف اليلوم وحجيك احجيه
مادامك جمر ماتنجوي بنار
اذا كلمن حجه بحجاره نرميه
اغلى من الذهب جاصار الحجار

علاء الياسين





81____

خدمتك ياوطن وبكلهن وياك
مكلف.. وحتياط ..وطائفيه

وبعد دفتر خدمتي ايحب الاختام
ابنص البيت وتختمه الشضيه

مره اهديلي ضحكه اضحكهه باحساس
ضحكت اهواي من شر البليه

يحيى العلاق





82______
انت حزورة لغـــــــز هذا الزمان
ياهـــــو اليغامر يحــــــل حزورتك
مــــا اعلگ صورتـــك داخل البيت
آني اشيل البيت اعلگه ابصورتك
يا علي دوره دخل بيـــــك الزمان
اويفتخــــر متعلـــــم ابصبورتــــــك

محمدالكوكز






83___
راح اطم الروح يم بابك نوه
وانته من اعطش اسگیني بمايكم
كبرتني وفتح بعيني الضوه
وصرت نخله وخضرت جيرانكم


حازم السهلاني





84____
ضجت من الحزن ماعدكم افراح
اريداً كلبي يفرح كلشي ماريد
اريداً عيد كون ايجيني مرتاح
لان يومية ضايج جايني العيد

محمدخيرلله





85____
لاتراوغ نوبة لاء ونوبه ايه
صفي نيتك كون كلش صافية
انه ثوب يلوكلك من اشتريت
وكلها راح تصيحلك بالعافية


رعد الازرقي

86_______
يادوه ايشفي والك ذني العيون
انت عيني اشطلعك من عيني ؟
كلشي جان بناظري لجلك يهون
وانه الك منذور زيني وشيني


صاحب الضويري








87_____

لا تشيد قصر يم خيمة فقير
وحرمه عاجر لاتراويها الجهال

حسين السيد نور




88___
والبوق وبندام سوه
إيموتون لو ماكو هوه
السيد رحيم الشطره




89___يكولون الحلم تفسيره مكلوب
صار اسنين احلم بيك رايح
ميثم الزيداوي




90_____جنت للباب ما اقبل تطلعين
هسه اشلون اطلعج من حياتي
علي الضرغام






91___ مثل شذره الكرامه ومحبس الانسان
وبيهه شكد محابس ذبت الشذره
سمير صبيح




92______ ضعت من ايدي نسمه ابريح والهاليوم
اباوع بالهوه ومتاني الكيها
لؤي العبودي




93___
طفل كلبي اجه وماشايل افلوس
ونته امنين ما اباوع دكاكين

جبار رشيد




94_____ بين عين وعين احطك لو اجيت
يالله كلي شلون روحـــــــــي تعوفك
خاف وحده تشوف غيرك تشتهيه
حته الاخره مـــــــن تصدله تشوفك

سعودالخفاجي







95___
صباح الخير اكلك لو مسه الخير؟
أخر مره نايم مدري يمته!
انام منين؟وانت منين مانام
عفتني وجي عفتني النوم عفته
غزوان العتابي







96_____ شكد ردت اكتفي من النضرة الاولى وياك
اغمض والفصوص من الجفن تطفر
يانضرة براءة تضل براء وياك
أذا نضراتي جانت بالجفن تحفر

ايهاب المالكي






97__ بس نوع طبع الوفة
وبس نوع طبع الجفة
هذا حسب قاعدة
يعني ضميرك صفة
لو فاقد الذاكرة
لو ذاكر الفاقدة

ضرغام العراقي






98_____و اركض بالعكس لو بي دار الكون
اصير آنة اليهد والناس مشحوته

جبار رشيد





99_____ الدنيه فكت ريجهه بشمه هواك "
يمته أفكن بيك ريج أعيوني

زاهر الصباغ




100___
اصعد على الشجره واكتب اسمك فوگ
مو شغله بطر .بس ردته يتمرجح
يحيى العلاق

يتبع في تدوينه ثانيه