غربه

حلمك علَـَيْ ... يا حزن
حلمك علَـَيْ ..... يا ليلْ
لا صبري ذاك الصبر
ولا حيلي ذاك الحيلْ
طالت علـَيْ غربتـي
وراواني عمري الويلْ
* * *
كلما أكول :الفــرحْ
باجر, يوافينــي
وينزاح ليل الحــزنْ
وتخضٍّر سنينـــي
ويردْ حمام الصبــح
ويحط على عيونـي
واصرخ واكولن هلي
يا ديره ضمّيني
يصفعني جف الحلـــمْ
والحسره تجوينـي
* * *
مجروح يا غربتي
وين اليداويني ؟
تايه أدوّر هلي
يا هو اليدلّيني ؟
طحت آني وآني الجملْ
كثرت سجاجينــي
* * *
يا ليل حلمك علـَـي
حلمك علـَـى اعصابـــي
عضّيت جف النـدمْ
حـــد إنكسر نابـــي
ما حد دره بعلّـــتــي
حتى اقرب أصحـابي
كلما أغمض الجـفــنْ
أتخيّل احبابي
واسمع رنين الحجـلْ
يركص على أعتابي
واجفل
واكولن
هَليْ
واركض
وافك بابي
ما الكه غير الحــزنْ
بوجوه الأجنابِ
* * *
يا ليل ..... خبّر هليْ
ضعت وخذاني السيلْ
تاهت علـَي خطوتي
وضيّعت نجم سهيـل
بس عمري م اتغيّرت
ذاك آني حبّة هيـل
أضحك وأطش الفرح
وبروحي ترفس خيل
مجروح وانزف شمع
يضوي بصواني الليل
كلما صفعني الوكت
كلت اصفع بكل حيل
بيدي ازرعت غربتي
وبيدي حصدت الويل
* * *
حلمك علَـَيْ ... يا حزن
حلمك علَـَيْ ..... يا ليل
لا صبري ذاك الصبر
ولا حيلي ذاك الحيل
طالت علـَيْ غربتـي
وراواني عمري الويل