عالماكو بعد هيهات ابجي العين

علماكو بعد هيهات ابجي العين
ولامشي الجدم علمامش بشورك
صرت موكد جمر وبحضني شلت النار
ولاجديت الجمر من باب تنورك
بستانك حلف مايشرب الماي
وغطاه الملح وندفنت زهورك
ناطورك جنت وعلصبخه بيرك جان
وياورده التموت تحلفه ناطورك
مثل دم القلم من الورده تطلب ثار
وك حرف ويضيع بسطورك
سميتك نجف بس ردت اشوف الموت
دفنت العين كوه بوحشت كبورك
حنيت الجفن والدمعه سدهه اللون
ولايبجن بعد بهلال عاشورك
ولاصيرن نهر يجري علطولي الماي
يذبني عللملح مليته ناعورك
ولاصيرن كحل واستر دموع العين
وتبدل الكحل برماد تنورك
بحرك شعر ابني عجرفه الموت
بس شبخت قلم وعبرهن بحورك
عصفورك جنت بس نادم انا بهاي
خلص عمره بقفص سجنه ومات عصفورك